• Enpresa berritzaile gazteentzako saria jaso duen Surphasek ura modu jasangarri eta efizienteagoan erabiltzeko soluziobide teknologikoak bultzatzen ditu.
• Enpresa berritzaile finkatu gisa aintzatetsitako iLine Microsystem in vitro diagnostikoari egindako ekarpenagatik eta nazioarteko osasun arloan duen eraginagatik nabarmendu da.
• Aurten, EHUko Kimika Fakultateak jaso du Aintzatespen Berezia, zientziari egindako ekarpenagatik eta hiriko ikerketa ekosistemaren garapenean funtsezko zeregina betetzeagatik.

DonostiaINN Sarien X. edizioak, gaur arratsaldean, aintzatetsi ditu Donostiako berrikuntza ekosisteman funtsezkoak diren hiru eragileren ibilbidea eta ekarpena: Surphase, iLine Microsystems enpresenak eta EHUko Kimika Fakultatearenak. Maria Cristina hotelean egindako ospakizunak amaiera bikaina eman dio Donostia Sustapenak zientzia, teknologia eta enpresa arloetako hiriko erakundeekin elkarlanean antolatzen duen Berrikuntza Astearen XII. edizioari.

Orain dela hamarkada bat sortu ziren aintzatespen horiek nabarmentzen dute berrikuntza lehiakortasunaren eta hazkundearen eragile bihurtuta bai sektoreko, bai hiriko erreferente bilakatu diren enpresetako lanaren balioa. Sariek ikusgai jartzen dute Donostia hiriaren gaitasuna eragina duten proiektuak sortzeko, talentua erakartzeko eta –berrikuntza arloan– mundu mailako erreferente bihurtzeko.

Ekitaldian hiriko berrikuntza-ekosistemako erakunde ugari izan dira, baita Turin, Espoo, Grenoble, Porto edo Bolonia bezalako hirietako ordezkariak ere, zeinekin berrikuntzaren Europako hiri ertainen sare bat ehuntzen ari den. André Sobczak, EUROCITIESeko idazkari nagusia, edo Manuel Heitor, Horizonte Europaren tarteko ebaluazioari buruzko Europako Batzordeko Aditu Taldeko presidentea ere bertan izan dira.

Donostiako alkate Jon Insaustik azpimarratu du, Berrikuntzaren astean parte hartzeko aukera izateak ilusio handia egiten diola, eta are gehiago, jakinda DonostiaINN sariaren Aitaztespen Berezia nork jaso duen ikusita. Izan ere, "Donostia zientzia, ezagutza, teknologia eta berrikuntzaren hiria bezala ezagutua izatera iritsi bada, hori gure unibertsitateek ere, eta kasu honetan, EHUk egiten duen lanari esker da". Horren harian, Insaustik segidakoa esan du: "Hainbat eragileren elkarlanari esker, Donostiak ikerketa-ekosistema garatu du. Eta horrek egin gaitu erreferente. EHUko Kimika Fakultateak ekarpen handia egin dio horri guztiari, eta egun Donostiak duen ekosistema horretan funtsezko eginkizuna izan du".

Horiek horrela, Donostiako alkate Jon Insaustik, eskerrak eman dizkie hirian berrikuntza, zientzia eta ezagutza sustatzeko lan egiten duten erakunde, eragile eta pertsona guztiei: "Hiriak asko sakondu du azken hamarkadan berrikuntzaren esparruan. Gero eta pertsona gehiagok, hain zuzen ere, 6.000 pertsona baino gehiagok lan egiten du gure hirian arlo honetako jardueratan, eta horri esker, hau da, gaur sari banaketa hauetan elkartu garen guztiei eta beste hainbati esker, Donostiak I+G+Bn herrialde aurreratuen tankerako inbertsioa egin dezake, hain zuzen ere, BPGren %3,6. Horregatik, mila esker guztioi, zorionak gaur saria jaso duzuenei, eta jarrai dezagun guztiok elkarlanean Donostia berrikuntzan erreferente egiten".

Ane Oyarbide Ekonomia eta Tokiko Enplegurako zinegotziaren arabera, "berrikuntza ezinbesteko eragilea da gure hiriaren garapenerako. Saritutako enpresa eta entitateek bultzatu nahi dugun etorkizun eredua jarraitzen dute: aukerak, kalitatezko enplegua eta gure eguneroko bizitza hobetzeko bideak sortzea ahalbidetzen duten proiektuak".

Azkenik, Iñigo Olaizola Donostia Sustapeneko zuzendari orokorrak nabarmendu duenez, "sari hauek talentuaren aintzatespen gisa planteatzen dira, gure enpresen berritzeko gaitasuna eta Donostian berrikuntzaren alde egiten dugun apustuarekiko konpromisoa. Udaleko Berrikuntza Agentzia garen aldetik, gure hirian ekonomia eta enplegua garatzen laguntzen duten eragile, enpresa eta ekimen horiek guztiak babesten eta bultzatzen jarraitu nahi dugu, berrikuntzaren aldeko apustua eginez, baina gizartean eragina izanik ".

Edizio berezi honetan, enpresa eta entitate hauek jaso dute aintzatespena:

SURPHASE – Enpresa Berritzaile Gaztea

Aurtengo saria Iliane Rafaniellok eta Thomas Schäferrek 2018an sortu zuten Surphase (Ingenious Membranes SL) enpresari entregatu dio Iñigo Olaizola Donostia Sustapeneko zuzendari orokorrak. Enpresak punta-puntako teknologia garatzen du edateko ura sortzeko instalazioetan uraren arazketaren efizientzia optimizatzeko.

Patentatu duten teknologiak alderantzizko osmosirako mintzen garbiketa hobetzen du, murrizten baitu uraren, energiaren eta produktu kimikoen kontsumoa. Berrikuntza horrek erantzun nahi dio munduko erronka handietako bati: ura bezalako oinarrizko baliabidearen erabilera jasangarria eta arduratsua bermatzeko premiari.

iLINE MICROSYSTEMS - Enpresa Berritzaile Finkatua

Enpresa finkatuaren saria Ane Oyarbide Ekonomia eta Tokiko Enplegurako zinegotziak entregatu dio Iñaki Sádabak eta Jon Peónek 2007an sortu zuten Donostiako enpresa bioteknologikoari. In vitro diagnostikoa egiteko doitasun handiko gailuen garapenean eta fabrikazioan espezializatutako enpresak nazioarteko aintzatespena lortu du odolaren koagulazioarekin zerikusia duten gaixotasunak monitorizatzeko soluziobideengatik.

Teknologia propioa eta ikerketarekiko konpromiso sendoa dituen iLine erreferente bihurtu da osasun sistema bat baino gehiagorentzat, mundu osoko pazienteen bizi kalitatea hobetzea helburu duten produktu berritzaile eta fidagarrien garatzaile delako.

EHUKO KIMIKA FAKULTATEA – Aintzatespen Berezia

Zortzigarren urtez aintzatespen berezia ere egin zaio gure hiriko ikerketa eta berrikuntza arloan lan garrantzitsua egin duen eta, jarduera horri esker, Donostiako ekonomian eragina izan duen pertsona edo entitateari.

Jon Insausti Donostiako alkateak entregatu duen aintzatespena EHUko Kimika Fakultateak jaso du, irakaskuntzaren, ikerkuntzaren eta ezagutza eskualdatzearen arloetan erreferente den zentroak. 200 profesional inguru eta egunean mila pertsonatik gora biltzen dituen komunitatearekin, Kimika Fakultatea oinarria izan da hiriko zientzia-zentro estrategikoak – CIDETEC, Materialen Fisika Zentroa, POLYMAT edo Donostia International Physics Center– sortzeko orduan.

Bere laguntza erabakigarria izan da lehenengo mailako ekosistema zientifikoa garatzeko eta Donostia ikerketaren nazioarteko mapan kokatzeko.

WeekINNen XII. edizioaren mailako itxiera

Ospakizunak buru eman dio bereziki jendetsua izan den WeekINN asteari, zeinek berriz ere hurbildu baitizkie herritarrei zientzia, teknologia eta ekintzailetza. Mintegiek, bisitek, profesionalen topaketek eta dibulgazio jarduerek, hala nola FOMOINN Berrikuntzaren Jaialdiak, agerian utzi dute hazten, dibertsifikatzen eta etorkizunari anbiziotsu begiratzen dion ekosistemaren indarra.

Ane Oyarbide Ekonomia eta Tokiko Enplegurako zinegotziak esan duenez, "berealdiko WeekInn batez gozatu dugu berriro, adin guztietako pertsonei gure zientzia eta berrikuntzaren ekosistema hurbiletik ezagutzeko aukera ematen dien asteaz. Donostiako gizartea gero eta gehiago konturatzen da sektore horren balioaz eta ekarpenaz, eta urteroko hitzordu hau modurik onena da sektorea ezagutarazteko eta arretagune bihurtzeko. Lankidetza publiko- pribatua funtsezkoa da bide honetan aurrera egiteko; hori dela eta, aintzatetsi nahi dut gure enpresa, ikerketa zentro eta unibertsitateen konpromisoa, ezagutza hiriaren aurrerapen bihurtuz, etorkizun profesionala hemen eraiki nahi duten gazte askorentzako enplegu aukerak sortzen dituztelako".

WeekINN 2025 markatu duten giltzarriak

WeekINN 2025ek hiriko berrikuntzaren norabidea erakusten duten hainbat ikaskuntza eta partekatutako gogoeta utzi ditu.

FOMOINNen, 4.000 pertsonak baino gehiagok gozatu dituzte STEAM direlakoez modu entretenigarri eta dibertigarrian. Jaialdia belaunaldi berrien topagune bihurtu da musika lehiaketen, bideoklipen eta “oilar borroken” bidez. Gazte talentudunekin antolatutako hitzaldietan ikasi dugunez, pasioa, jakin-mina eta diziplina izan dira beren garapen profesionalaren eragile.

Zibersegurtasunari eta adimen artifizialari buruzko saioek agerian jarri dute konfiantza digitala sendotzeko premia: herritarrak prestatu, enpresei lagundu eta espero baino azkarrago iritsiko diren erronka teknologikoei aurrea hartu behar diegu. Azpimarratu da berrikuntzak balioa sortzen duela, bai, baina soilik zuhurtasunez, modu etikoan eta gizartearen mesederako ezartzen denean.

Ekintzaile eta inbertitzaileekin hitz egiteko guneetan ideia argi bat sortu da: proiektu bat haz dadin, bai anbizioa, bai laguntza behar ditu. Behin baino gehiagotan azpimarratu da garrantzitsua dela eredu jasangarriak eraikitzea, inbertitzaile bat benetan zeren bila dabilen ulertzea, eta helburuaren eta negozioaren arteko oreka aurkitzea.

Bestalde, talentu zientifikoan oinarritutako hiriei buruzko nazioarteko eztabaidak mahai gainean jarri du hiriguneek ikerlariak erakartzean izaten duten zeregin estrategikoa.

Nabarmendu denez, hiri berritzaile bat definitzeko ez da nahikoa azpiegitura; bizi kalitatea, ekosistemarekiko lotura eta ikerlariei eta ekintzaileei aukera egonkorrak eskaintzeko ahalmena ere behar dira horretarako.

DonostiaINN sariak banatzeko ekitaldiak berretsi du ikuspegi hori: berrikuntzak aurrera egiten du, baldin eta erakundeek, enpresek, ikerketa zentroek eta herritarrek norabide berean arraun egiten badute. Aurten aintzatetsi diren proiektuek erakutsi dute Donostian berrikuntza erantzukizun partekatu gisa bizitzen dela.

Oro har, asteak agerian jarri du hiriaren etorkizuna eraikitzen dela oinarri hauek hartuta: lankidetza, jakin-mina, eta ideia onak benetako eragin bihurtzeko gaitasuna.