• WeekINN Berrikuntzaren XII. asteko hitzordu nagusiak izango dira FOMOINN Jaialdia, AA hobeto ulertzeko jardunaldi irekia, eta Zientziaren eta talentuaren aldeko apustua egiten duten Hirien Nazioarteko Biltzarra.
• Berrikuntzaren Asteak berriz ere lotura guneak sortuko ditu herritarren eta hiriko I+G+b eragileen artean, zientzia eta berrikuntza gizartera hurbiltzeko.

Tokiko Ekonomia eta Enplegu zinegotzigoak antolatzen du Berrikuntzaren XII. astea, Donostia WeekINN, Donostia Sustapenaren bitartez eta zientziaren eta berrikuntzaren tokiko ekosistemako zenbait eragilerekin lankidetzan, eta hilaren 15etik 21era izango da. Orain arteko 11 edizioetan parte- hartze handia izan du, eta 400 jardueratik gora antolatu ditu hiriko hainbat eremutan, Estatuko eta nazioarteko hainbat erakunderekin lankidetzan. Aurten ere, lankidetza hori funtsezkoa izango da.

Aurtengo edizioak programazio berritua aurkezten du, gazteekin konektatzeko helburuarekin. WeekINN ekitaldiari hasiera emateko, FomoINN Berrikuntza Jaialdia egingo da Kursaalean, eta DonostiaINN sarien hamargarren edizioak emango dio amaiera. Berrikuntzaren Astea, azken batean, Donostia Sustapenak zientzia eta berrikuntza herritarrei hurbiltzeko proposatzen duen erakusleihoa da.

Ane Oyarbide Ekonomia eta Tokiko Enpleguko zinegotziarentzat, "WeekINN aukera bikaina da herritarrek Donostia berritzailea, irekia eta talentuduna ezagutu dezaten eta aktiboki parte har dezaten. Lehen mailako ekosistema zientifiko eta teknologikoa duen hiria, hiria berrikuntzaren Europako mapan kokatzen duten zentro, enpresa eta profesionalekin. Aurten, gainera, jaialdiak gazteengan jartzen du arreta, haiek baitira gure hiriaren etorkizuna ordezkatzen dutenak. Zientzia eta berrikuntza sormenetik, ikaskuntzatik eta parte-hartzetik hurbildu nahi diegu, eta erakutsi nahi diegu beren talentua eta kezkak garatzeko espazio bat dutela hemen ". Horregatik, Oyarbidek adierazi duenez, "edizio honetako programazioa zabala eta anitza da, publiko guztientzat pentsatua, eta gaur egungo esparruetan sakontzea ahalbidetuko du, hala nola zibersegurtasunean, teknologia kuantikoetan edo adimen artifizialean, interes handiko beste arlo batzuen artean".

Aurtengo WeekINN ekitaldiak jarduera hauek izango ditu egunez egun:

FOMO INN – Azaroak 15 eta 16 (Kursaal)

Berrikuntzari buruzko diziplina anitzeko jaialdi irekia, gazteek eta gazteentzat diseinatua, zeinetan sormena, teknologia eta aisialdia nahasten baitira, talentu emergentea ikusarazteko, topaguneak eta lankidetzarako aukerak sortzeko eta STEAM bokazioak sustatzeko.

Jaialdiaren izena FOMO –fear of missing out, kanpoan geratzeko beldurra– siglak eta INN letrak – innovación edo berrikuntza– konbinatuta sortu zen. Kezka hori eraldatuz, FOMOINN bultzada bihurtzen da, parte hartu, sortu eta konektatzeko gonbita egiten baitigu.

Hilaren 15ean eta 16an, Kursaala teknologiaz, musikaz, artez eta talentu gaztez beteko da, partaidetzazko askotariko programazio baten bidez: banda lehiaketa bat (3 banda finalista), bideoklip lehiaketa bat (16 proposamen aurkeztu dira) eta zuzeneko oilar-joko bat, 16 rap-kantarirekin.

Gainera, adin guztietarako jarduerak egongo dira:

• Teknologia tailerrak, bideojokoak, Minecraft, droneen hegaldiak eta esperientzia interaktiboak, haurrak eta familiak berrikuntzara hurbiltzeko.
• Nerabeentzako jarduerak, errealitate birtualeko betaurrekoak, simulagailuak, Roblox, eta Tinkercad erabiliz, beso robotikoak sortuz, drone lasterketak eginez eta robotika polimerikoaren bitartez.
• Zenbait gazte ekintzailek –besteak beste, Januss Lesterrek, Nexgraffek eta Nerea Zusberrok– ekintzailetzaren, sormenaren eta teknologiaren inguruko proiektuak, esperientziak eta ikaskuntzak partekatuko dituzte.

Azken batean, FOMOINN berrikuntza barrutik bizitzeko jaialdi bat da, gazteak motor gisa eta hiria sormen- eta aukera-gune gisa aurkezten dituen hitzordua.

CYBERFRONT – Azaroak 17 eta 18 (Kursaal & Reale Arena)

Ekitaldi honek Euskadi zibersegurtasun aurreratuaren, adimen artifizialaren eta teknologia kuantikoen Europako mapan kokatzen du. Helburua: etorkizun digitala aurreratzea eta seguruago, gizatiarrago eta kontzienteago bihurtzea.

Hilaren 17an, adituak, startup-ak eta inbertitzaileak Kursaalen bilduko dira, zibersegurtasuna hainbat ikuspegitatik aztertzeko; hilaren 18an, berriz, Reale Arenan, gazteak, ekintzaileak eta familiak zibersegurtasuna gure eguneroko bizitzan nola ezarri ikasiko dute.

GAIA Klusterrak eta CyberEUS erakundeek antolatzen dute Cyberfront, Cybertix Simulation Technologies eta EXVOLUTION erakundeekin batera eta Donostia Sustapenaren eta INCIBE – Zibersegurtasuneko Institutu Nazionalaren laguntzarekin.

Sarrera doakoa da eta zabalik dago berrikuntza teknologikoak eta segurtasun digitalak gure hirien etorkizunean izango duten inpaktuan interesa duten guztientzat.

ADIMEN ARTIFIZIALA – “AA ulertzen” – Azaroak 18 (Kursaal)

Adimen artifiziala izango da herritarrentzako doako sarrera duen dibulgazio jardunaldi honen protagonista. Jardunaldiaren helburua da AA jendeari modu errazean hurbiltzea, kontzeptuak desmitifikatzea eta dagoeneko gure gizartea eraldatzen ari diren aplikazio errealak erakustea.

Retinako zuzendaria eta analista den Jaime García Canterok dinamizatuko duen ekitaldia hau, BAIC zentroarekin (Basque Artificial Intelligence Center) lankidetzan antolatutakoa da, elkarrizketa ireki eta irisgarri bat sortu nahi da AAk gure eguneroko bizitzan eta lurraldearen subiranotasun teknologikoan duen inpaktuari buruz.

“HABLANDO EN PLATA” CON MATHIEU CARENZO – 19 de noviembre (EKINN)

Saio inspiratzailea eskainiko du Mathieu Carenzo ekintzaile eta inbertitzaile aitabitxiak, zeinak hogei urte baino gehiagoko esperientzia baitu startupei hazten eta finantzatzen laguntzen. Carenzok ekintzailetza prozesuaren etapa guztietan zeharreko –sorrera, finkapena eta inbertsio bilaketa– ibilbide praktiko bat aurkeztuko du, ekintzailetzaren erronka, zalantza eta mito nagusiak azalduz.

Saio honetan, aurrerapausoa eman eta ideia bat enpresa sendo bihurtzeko gakoak emango ditu, beste ekintzaile batzuekin konektatzeko aukera emango duen ikaskuntza partekatuko ingurune batean. Gainera, Carenzok “Hablando en Plata” bere azken liburuaren zenbait ale oparituko ditu.

“Talent-based Science Cities” NAZIOARTEKO BILTZARRA – Azaroak 20 (EKINN)

Biltzarrean aztertuko da nola indartu Europako hirien lehiakortasuna talentu ikertzailea erakartzeko eta fidelizatzeko, etengabe eraldatzen den mundu mailako testuinguru batean.

Topaketak Grenoble, Espoo, Turin edo Bolonia hirietako ordezkariak bilduko ditu, baita Eurocities bezalako sare europarrak ere, Europan eragin handiena duena eta Europako 38 herrialdetako 200 hirik baino gehiagok osatzen dutena. Helburua zerbitzua ematen dieten 130 milioi pertsonei ahalik eta bizi- kalitate onena eskaintzea da, eta talentu zientifikoa erakartzeko eta fidelizatzeko eta berrikuntza hazkunde-motor gisa bultzatzeko gai diren hiri-inguruneak nola eraiki eztabaidatuko dute.

Portugalgo Zientzia, Teknologia eta Goi Hezkuntzako ministro ohi Manuel Heitorren esku egongo da “Talentuan oinarritutako hiri zientifikoak, Europako ikuspegi batetik” irekiera saioa. Bertan izango dira, halaber, Eurocities sareko idazkari nagusi Andre Sobczak eta Tecnaliako zuzendari Jesús Valero, eta, gaur egun, Ikerketa eta Teknologia Zentroen Europako Elkarteko (EARTO) presidentea. Biek talentua erakartzeko eta fidelizatzeko estrategiak aztertuko dituen mahai inguruan parte hartuko dute.

Azkenik, kuantikari eta bioteknologiari buruzko ikerketa bisitak antolatuko dira, parte hartu duten hirientzat. Donostiako ezagutza emergentearen funtsezko bi sektoretan praktikoki murgiltzeko aukera izango da.

Donostia INN SARIAK - Azaroak 20 (Maria Cristina Hotela)

XII. WeekINN ekitaldiari amaiera emateko, Enpresa Berrikuntzaren Donostia INN Sariak banatzeko gala egingo da. Aurten 10 urte beteko dituzten sarion bidez, Donostia Sustapenak enpresa proiektuetan berrikuntzaren aldeko apustu irmoa egin duten eta gaur egun beren sektorearentzat eta hiriarentzat erreferente diren erakundeak saritzen ditu. Galan, enpresa berritzaile gaztea eta finkatutako enpresa sarituko dira, eta hiriaren berrikuntzarekin konprometitutako erakunde bati ere aitorpena egingo zaio.

Lankidetzaren aldeko apustua

XII. Berrikuntza Astea, WeekINN, ViveBiotech, Naru, Multiverse, Trebe edo Scott & Irwin bezalako enpresa eta startupen; CFM edo IIS Biogipuzkoa bezalako zentro teknologikoen; Tecnun, Tecnun eRacing, MotoStudent edo Musika Eskolaren Hezkutzaren munduko eragileen: eta BAIC, Emakumeak Zientzian, La Cueva del Talento edo CyberEUS bezalako elkarteen lankidetzari esker izango da posible.

Astearen ekimenak Janus Lester, Nerea Zusberro, Nextor Otaño, Sara Rekalde, Iker Ruiz, Usue Mori, Oihan Vega eta Maddi Arzallusen laguntza ere izango dute.

WeekINN ekitaldiaren inguruko informazio guztia eta ordutegiak dagoeneko eskuragarri daude weekinn.fomentosansebastian.eus webgunean.