- Donostia Sustapenak AA, Cleantech eta Biotech arloekin lotutako Donostiako 7 enpresa lagunduko ditu Turinera, inbertitzaile potentzialekin eta sektoreko eragileekin konexioak ezartzeko.
- Donostiako misio korporatiboa Udal Elkartearen ia kontseilu osoa izango da, eta berrikuntza- eta ekintzailetza-estrategia Turingo Udalean partekatuko du.
- Donostia Sustapenaren ildo estrategikoetako bat da Donostia berrikuntzaren eta aukera-espazioaren zentro gisa nazioartean kokatzen laguntzea.
Donostiako enpresa emergenteak, LINQ, NORMO, EKILABS, TREBE, NUAVIS, GOLDEN GAIT eta ONENA MEDICINES, guztiak ere Donostia Sustapenaren EKINN+ azelerazio-programan parte hartzen dutenak, egun hauetan Turinen, 2025eko Berrikuntzaren Europako Hiriburuan, dagoen misio korporatiboaren parte dira. Enpresekin batera, udal-sozietatearen kontseilu ia osoa ere bertaratu da.
Misioa Donostia Sustapena hiria nazioartean berrikuntzaren zentro gisa kokatzeko egiten ari den apustuaren parte da, berrikuntza eta ekintzailetza sustatzeko hiri estrategikoekin loturak garatuz eta proiektuak eta talentua Donostiara erakartzea ahalbidetuz.
Ane Oyarbide Ekonomia eta Tokiko Enpleguko zinegotzia buru duen ordezkaritzari harrera egin dio Michela Favaro alkateordeak Turingo udaletxean. Harreran, Oyarbidek Gipuzkoako hiriburuak azken bi hamarkadetan gaur egun zientzia eta berrikuntzaren hiria bilakatzeko hartu duen bidea aurkeztu die Favarori eta Turineko gainerako ordezkari publikoei. “Berrikuntzaren eta enpleguaren aldeko apustu garbia egin dugu, Donostia hiri moderno, lehiakor eta sozialki erakargarri gisa sendotu dadin”, adierazi du.
Turingo alkateordeak interes handia agertu du Donostiaren inguruan, eta urte amaieran Gipuzkoako hiriburua bisitatzeko eta laguntzen jarraitzeko gonbidapena onartu du, datorren Berrikuntzaren Astearen baitan.
Oyarbidek azpimarratu duenez, “topaketa honek aliantzak ehuntzeko balio izan digu, bai Turinek bai Donostiak erronka asko partekatzen dituztela egiaztatzeko, hala nola biztanleriaren zahartzea eta zientziaren eta ezagutzaren arloan gorabidean dauden sektoreen aldeko apustua egiteko beharra, kalitatezko enplegua eta ekintzailetzarako aukerak sortzea ahalbidetuko duen ekonomia indartsu bat sortzeko, batez ere gazteen artean”.
Gaur egun, Turin, Portugalgo Braga hiriarekin batera, 2024-25 Berrikuntzaren Europako Hiriburua da eta Europar Batasunak saritu du, herritarren mesedetan egindako irtenbide berritzaileengatik. 650 enpresa emergente eta ETE berritzaile baino gehiago ditu eta munduko 100 enpresa emergenteen ekosistema onenetako bat da. Italiako bigarren hiria da inbertsio-bolumenari dagokionez, 1 bilioi euroko ahalmenarekin, LIFTT barne, Italiako Deep Techeko arrisku-kapitaleko inbertitzailerik handiena.
Era berean, azpimarratzekoa da Gizarte Berrikuntzaren aldeko apustua; izan ere, Europan ekosistema liderra da esparru horretan, eta hainbat adibide ditu, hala nola hiri-berrikuntzako laborategi irekia (Torino City Lab). Gainera, hiria berroneratzeko eta eraldatzeko prozesuetan tradizio handia du eta proiektu handiak ditu hiri osoan zehar.
Turinera egindako bisitan, Donostiako misio korporatiboak Italiako hiriaren berrikuntza- ekosistema, hiri-eraldaketako proiektuak eta berrikuntza sozialaren aldeko apustua ezagutu ditu. Horrela, OGR zentroa bisitatu du, XIX. mendeko industriagune zahar bat, zientzia, teknologia eta berrikuntzaren hub bihurtu dena. Eraikinak lanerako eta coworkingerako guneak ditu, eta startupei beren proiektuak garatzeko laguntza eskaintzen die, hala nola mentoretzak, kapitalerako sarbidea eta sare korporatibo eta akademikoak.
Bestalde, Donostiako enpresa emergenteek, Politecnico Di Torino bisitatzeaz gain, non ekintzailetza-ereduei eta transferentzia teknologikoari buruzko hausnarketak partekatu ahal izan dituzten, beren proiektuak tokiko inbertitzaileei aurkezteko aukera ere izan dute, baita tokiko enpresa emergenteekin aldebiko bilerak egiteko ere.
Donostia Sustapenaren eta Turingo ekosistemaren arteko lankidetza 2017an hasi zen, Europako ECORIS3 proiektuarekin. Harrezkero, beste proiektu batzuetan parte hartzeaz gain, talentuaren eta ekintzailetza berritzailearen arloan ezagutza trukatzeko lan-ildo partekatu bat aktibatu da bi hirien artean. Europako Batzordearekin batera finantzatutako INTERREG bezalako proiektuetan parte hartzeaz baliatuz, horrelako bisitak egiten dira nazioarteko loturak indartuz Donostia Sustapenak ekintzailetzari laguntzeko duen estrategia indartzeko, bi hirietako tokiko enpresa emergenteak inplikatuz.
Izan ere, Udal Sozietatearen 2025erako Berrikuntza Planak, 6 milioiko hornidurarekin, Hiria Berrikuntza Zentro gisa nazioartean kokatzeko ildo estrategiko bat biltzen du. Planak Donostia Sustapenaren konektore rola indartzen du, hiria aukera-gune gisa aktibatuz.