• Parte hartu duten 47 enpresek, 150 lan-eskaintzarekin, hautaketa-prozesuak abiatu dituzte Azokan lehen harremana izan ondoren.
• Enpresen eta hautagaien arteko topaketa hori errazteaz gain, Donostia Sustapenaren orientazio-zerbitzuak eskaini ziren lan-merkatuarekiko harremana errazteko, eta hitzaldi informatiboak ere egin ziren.

Donostia Sustapenak Reale Arena estadioan antolatutako Talentuaren III. Azoka arrakastatsua izan da. Parte hartu zuten 47 enpresek 150 lanpostu baino gehiago eskaini zituzten eta, azkenean, 340 elkarrizketa baino gehiago egin ziren. Azokan aldez aurretik lan-elkarrizketa bat hitzartzeko erregistratu ziren 480 pertsonetatik % 47,7 emakumeak ziren eta % 52,3 gizonak, eta % 63 35 urtetik beherakoak.

Nabarmentzekoa da, halaber, azokaren plataformak ia 7.000 bisita izan dituela, 63.000 orrialde bisitatu baititu. Erregistratuta zeuden pertsonez gain, aurretiko hitzordurik ez zuten hainbat pertsona hurbildu ziren estadiora, eta haiek ere elkarrizketak egin ahal izan zituzten. Hemendik aurrera langileak hautatzeko prozesua hasiko da, eta etorkizuneko kontratazioak egingo dira.

Ekonomia Garapeneko eta Enpleguko zinegotzi Marisol Garmendiak adierazi duenez, “Talentuaren Azokak, gazteei bereziki, aukera bat emateko helburua bete du, enplegu duinen eta kalitatezkoen bidez Donostian talentua atxikitzeko egiten ari garen ahaleginaren barruan. Lan-eskaintza ona duen enpresa-ekosistema bat dugu, eta topaketa hauek ahalbidetzen jarraitu nahi dugu, Donostiako talentua etxean gera dadin”.

Hirugarren edizio honekin, Talentuaren Azoka donostiarren garapen profesionalerako plataforma garrantzitsu gisa finkatu da eta, gainera, ikusgarritasuna eman die tokiko enpresek dituzten lan aukerei, hala sektore teknologikoetan nola tradizionalagoetan.

Aurten, ingeniariak eta Industria, Mekanika, Elektrizitate eta Informatikako teknikariak eskatu dira gehien, baina beste sektore batzuetan ere eskaintzak egon dira, esaterako, merkataritzan, marketinean eta komunikazioan, irakaskuntzan, administrazioan, osasunean eta ongizatean.

Aurtengo berrikuntzetako bat aholkularitza pertsonalizatuko zerbitzua da, zeinak curriculuma hobetzeko eta elkarrizketetarako prestatzeko laguntza eman baitzuen. Zerbitzu horri esker, 145 pertsonak aukera izan dute hurrengo elkarrizketetarako arrakastaz prestatzeko.

Punta-puntako tokiko enpresen eta lan-erronka berrien bila dabiltzan pertsonen arteko topagune bat sortzeaz gain, Azokan, zenbait enpresak (esaterako, Deneb Medical, Zuccheti, Ibermática, Vicomtech eta Cyber Surgery) digitalizazioari, adimen artifizialari, osasun arloko azken teknologiei eta curriculum on bat idazteko moduari buruzko hitzaldiak eman dituzte, Donostia Sustapenaren eskutik.

Topaketetara 300 pertsona hurbiltzeak hala profesionalen nola prestakuntza-zentroen interesa piztu du, eta aukera izan dute enpresek barrutik nola funtzionatzen duten ezagutzeko.

Talentuaren Azokara joan ezin izan zuten hautagaiek beren profilak Donostia Sustapenaren plataformara igo ditzakete (www.talento.fomentosansebastian.eus), parte hartzen duten enpresei beren hautagaitzak helarazteko.

Donostia Sustapenak talentuaren eta Donostiako enpresa-ekosistemaren arteko lotura hobetu eta bultzatzeko duen estrategiaren barruan dago Talentuaren Azoka. Aurreko bi edizioetan, ia 1.000 lan-elkarrizketa egin ziren, eta 750 pertsona baino gehiagok eman zuten izena. Gainera, orain arte parte hartu duten enpresen % 26k profesionalak kontratatu dituzte.

Laguntzarekin