• Donostia Sustapenak deialdi berri bat ireki du tokiko talentu gaztearentzat, donostiarren bizi kalitatea hobetzen duten ekimen berritzaileak aurkezteko.
• Garapen edo ezarpen bidean dauden proiektuak aurkeztu daitezke, baldin eta egiaztatzen bada bideragarriak direla, partaidetzarako planteatu direla eta hirian aldaketa positibo bat sortzeko asmoa dutela.
• Hautatzen diren proposamenek aholkularitza jasoko dute proiektuaren garapenean zehar, eta baita laguntza ekonomikoak, lanerako eremuen erabilera, ostatua eta lehentasunezko sarbidea udal sozietatearen programetan ere.

Donostia Sustapenak irekitako deialdiak gazteen parte-hartzea sustatu nahi du, haien sormena, lidergoa eta proposamen berritzaileen garapena sustatuz, hiriak aurre egin beharreko etorkizuneko erronkei aurre egiteko, hala nola inklusioa edo dinamismo komertziala. Azken batean, hiriko talentu gaztearen garapen pertsonal eta profesionalaren aldeko apustua da.

Gaur egun, erakundearen azken barometroaren datuen arabera, 35 urtetik beherakoak Donostiako biztanleriaren % 32 dira, baina adin tarte horrek % 13,8 egin du behera mende hasieratik. Udal sozietatearen aburuz, motibatuta eta inguruko beharrekin konektatuta dauden gazteak izanez gero, Donostia erantzun jasangarri eta eraldatzaileetarantz bideratu ahalko dugu.

Hiriko gazteekin egin den entzunaldi aktiboaren eta hausnarketa eremuen lehenengo fasearen emaitza da deialdi hau. “Talentu gaztearen alde egitea ez da bakarrik etorkizuneko belaunaldietan pentsatzea, baizik eta hiria eraikitzeko modu argia”, azaldu du Ane Oyarbidek, Ekonomia eta Tokiko Enpleguko zinegotziak, EKINNen antolatu den deialdiaren aurkezpenean. “Konpromisoa hartu behar dugu, gazteei prestakuntza ona eskaintzeko, kalitatezko enplegua sortzeko eta beren hirian duintasunez bizitzeko aukera ematen duten formulak bilatzeko”. Aurkezpenean, sozietatearen programetan parte hartu duten zenbait gazte egon dira Oyarbiderekin batera.

ALaguntza ekonomikoak, etxebizitza eta laguntza zerbitzua

Gutxienez ere goi mailako gradu bat duten 35 urtetik beherakoei zuzendua da deialdia, eta hauek dira eskaintzen dituen laguntza eta zerbitzuak:

1.) Laguntza pertsonalizatua. Etengabeko mentoretza proiektua garatu bitartean, arreta berezia jarrita gaitasun tekniko, estrategiko eta kudeaketarako gaitasunetan, proiektuak hirian izango duen inpaktua ahalik eta gehien zabaltzeko helburuarekin.

2.) Baliabideak, prestakuntza eta sareak. Prestakuntza espezializatua, aholkularitza pertsonalizatua eta esperientziak zein jardunbide egokiak partekatzeko lankidetza sare bat; hori guztia talentu gaztearen garapen pertsonal eta komunitarioaren eta ahalduntzearen mesedetan.

3.) Laguntza ekonomikoak:

• Hilean 500 € 12 hilabetez gehienez: proiektuaren ibilbide orrian ezarri diren helburuak erdiesteko behar den arduraldia posible egiteko.
• Proiektu bakoitzeko 2000 €-ra arte: martxan jartzeko gastuak eta ekimena garatzeko kostuak ordaintzeko.

4.) Lan eremuak. Donostia Sustapenaren instalazio batean lan eremu bat izateko aukera, bai proiektua garatzeko, bai hedapen jardueretarako.

5.) Hobaridun ostatua. Talent House edo EKINNen ostatu hartzeko aukera, 12 hilabetez gehienez.

6.) Prestakuntza eta azelerazioa jasotzeko lehentasunezko sarbidea. Donostia Sustapenak antolatzen dituen prestakuntza ekimenetan eta azelerazio programetan parte hartzeko lehentasuna.

Talentua garatzeko ekosistema oso bat

Donostia Sustapenak lan aukerak sustatzeko eta talentu gaztea erakarri eta fidelizatzeko daraman estrategiaren esparruan kokatzen da deialdi hau, eta barne ditu ere:

• Etengabeko prestakuntza: prestakuntza lantegiak ikasturte osoan zehar, ikastetxeetan ekintzailetzaren kultura sustatzeko.
• Aukeren ataria: hiriko I+G+b arloko enpresen eta profesional kualifikatuen arteko konexioa errazten du.
• Egonaldi programa: hobaridun ostatua eskaintzen du EKINNen, 2 urtera artekoa, proiektu ekintzaile berritzaile bat garatzen ari diren 35 urtetik beherako donostiarrentzat.
• Zuzeneko laguntza ekonomikoak enpresak sortu eta talentu gaztea kontratatzeko (EKINN Talent).
• Nazioarteko bekak: ordaindutako atzerriko egonaldiekin, gazteen garapen profesionalerako. 2014az geroztik 700 beka baino gehiago eman dira.
• STEAM bokazioak sustatzea: Donostia Innovation Challenge programari esker, zortzi urtetan, hiriko 3000 ikaslek baino gehiagok beren berrikuntzarako gaitasunak entrenatu dituzte eta izaera ekintzailea garatu dute.

Donostia, berrikuntzaren hiria

Deialdi hau entzute aktiboko prozesutik eta hiriko gazteekin sortutako topaketa- eta hausnarketa- guneetatik sortu da. Elkarrizketa horietatik proposamenak, kezkak eta lehentasunak sortu dira, eta gaur egun Donostian talentu gaztea babesteko eta bultzatzeko neurri zehatzak dira.

Talentu gaztea sustatzeko konpromiso eta apustu honekin, hiriak, Donostia Sustapenaren bitartez, adibidez, "Talentu Gaztea Sustatzeko Lankidetza Gida" egiteko COTEC-en lantaldea gidatu du, eta ekimen estrategikoak jarri ditu abian, hala nola Adimen Artifizial Aplikatuaren Katedra Tecnun-ekin edo Deustuko Unibertsitatearekin egindako hitzarmena, prestakuntza eta garapen profesionalerako aukerak sortzera bideratuak.

"Young Leaders San Sebastian" programa ere garatu du, Urban Future-rekin lankidetzan, talentua duten eta hiria eraldatzeko ideia berritzaile eta iraunkorrak planteatzen dituzten gazte donostiarrak identifikatu eta laguntzeko. Programa honi esker, tokiko bi gaztek Rotterdamen ospatutako "Urban Future" foroan parte hartu zuten.

Beste adibide bat "Donostia Gazte (hi) ria" Udako Ikastaroa da. Gogoetarako gune horretan, beren hiriarekin eta ingurunearekin konprometitutako gazteek eragin sozial handiko proposamenetan lan egin zuten, Donostiaren erronkei aurre egiteko zientzian eta ezagutzan oinarritutako formulak eta irtenbideak aztertuz.

Haiekin ere lan egin zen, RETINArekin batera, "Etorkizuneko protagonistak" ekitaldian, haiekin gogoeta eginez eta lan-merkatuan duten ikuspegia eta erronkak partekatuz.

Iñigo Olaizolak, Donostia Sustapeneko zuzendari gerenteak, azpimarratu duenez, "gazteekin konexio- espazioak artikulatzearen aldeko apustua egin dugu, funtsezkoa baita prestakuntzaren, enpleguaren eta etxebizitzaren eremuetan neurriak hedatzeko, eta Berrikuntza Planean garatzen dugun estrategiaren parte da, hirian talentu gaztea fidelizatzeko eta atxikitzeko".

Deialdi honekin Donostia Sustapenak lortu nahi duena da talentu gaztearen garapen profesionalari proiektu berritzaileekin bultzada emateko ingurune egoki bat sortzea. Horretarako, prestakuntzarako, enplegurako eta etxebizitza lortzeko aukerak eskaintzen zaizkie, eta enpresa ehunarekin konektatzen dira gazteak.

Programa eta deialdi guztiei buruzko informazioa Donostia Sustapenaren webgunean dago eskuragarri: www.fomentosansebastian.eus.